Մեծ եղեռնի 105-րդ տարելիցին նվիրված միջոցառում

24 ապրիլի, 2020

Ս.թ. ապրիլի 24-ին Օդեսայում Սբ. Գրիգոր Լուսավորիչ եկեղեցու բակում գտնվող Հայոց ցեղասպանության զոհերի հիշատակին նվիրված խաչքարի մոտ կազմակերպվեց ոչ բազմամարդ՝ Մեծ Եղեռնի 105-րդ տարելիցին նվիրված հիշատակի արարողություն:

Հիշատակի սրբոց կարգ մատուցվեց Օդեսայի Հայ առաքելական եկեղեցու հոգևոր հովիվ Տեր-Աբգար Քելեջյանի կողմից:

Միջոցառմանը ներկա էին Օդեսայում ՀՀ գլխավոր հյուպատոս Գևորգ Պետրոսյանը, Օդեսայի հայ համայնքի նախագահ Տիգրան Հարությունյանը, Օդեսայի մարզային խորհրդի պատգամավորներ մարզային խորհրդի նախագահի առաջին տեղակալ Վադիմ Շկարովսկու գլխավորությամբ, ուկրաինահայեր: Ներկաները ծաղիկներ խոնարհեցին Հայոց ցեղասպանության անմեղ զոհերի հիշատակի հուշարձանին:

Օդեսայի գլխավոր հյուպատոս Գևորգ Պետրոսյանը իր ելույթում նշեց, որ այսօր ողջ աշխարհի առաջ ծառացած կորոնավիրուսային հիվանդության մարտահրավերն է ստիպել, որ հայ ժողովրդի համար այս կարևոր՝ 1915 թվականի Հայոց Ցեղասպանության հիշատակի օրը նշենք սեղմ կազմով։ Այս տարի աշխարհի բոլոր երկրներում չեղարկվել են Մեծ Եղեռնի 105-րդ տարելիցի ավանդական բազմամարդ միջոցառումները, և այսօր՝ ապրիլի 24-ին, միայն ծաղիկներ են զետեղվելու Հայոց Ցեղասպանության հուշարձաններին։ Մայր Աթոռ Սուրբ Էջմիածնում և Հայ Առաքելական Սուրբ Եկեղեցու բոլոր տաճարներում մատուցվել է դռնփակ Սուրբ Պատարագ, իսկ ժամը 12-ին ղողանջել են բոլոր եկեղեցիների զանգերը՝ ի ոգեկոչումն Հայոց Ցեղասպանության զոհերի հիշատակի։

Գ.Պետրոսյանը նաև նշեց, որ ցեղասպանությունը մարդկության հանդեպ ծանրագույն հանցագործություն է,և անհրաժեշտ է դատապարտել հայերի ցեղասպանությունը, որպեսզի պատմության մեջ որևէ ժողովրդի դեմ չկրկնվի ոճրագործությունը։ Չպետք է մոռանալ, որ հայ ազգի համար հիշողությունը բարոյական պարտավորություն է, և մեր նշանաբանը միշտ եղել է, կա և կլինի՝ «Հիշում եմ և պահանջում»։

Հյուպատոսը իր ելույթի վերջում մաղթեց բոլորին առողջություն, ուժ և կորով՝ հաղթահարելու այն դժվարությունները, որոնք ստեղծվել են այսօր ինքնամեկուսացման և սահմանափակումների այս արտակարգ պայմաններում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր